LAOAG CITY – Inbatad ni Atty. Kidd Castro, Criminal Law Professor iti Northwestern University nga awan ti makitkita na a pagsungsungbatan dagiti kameng ti pulisya iti ili ti Bacarra iti pannakatay ti menor de edad kalpasan nga intarayan na dagitoy kabayatan ti panagpatrolya da.
Segun kenni Castro, adda ti protocol ti Philippine National Police nga isu ti sursuruten dagiti otoridad ken patien na nga awan ti pwersa a nausar nangruna ket minor offense laeng daytoy.
Kuna ni Castro a no adda man ti delikado a panangkamat dagiti otoridad kadagiti biktima a mangitunda kadagitoy iti narisgo a sitwasyon ket adda met ti maiyuswat nga imbestigasyon.
Kunana a no iti imbestigasyon ket mapaneknekan a kastoy ti pasamak ken adda met ti pagsungbatan da kas iti kaso kriminal ken administratibo.
Ummuna iti daytoy, inbatad dagiti otoridad a binusinaan ti biktima ken ti kadua na gapo ta saan da a nakasuot ti helmet ken vest ngem imbes a nagsardeng ket pinataray da ti motorsiklo da agingga a napasamak ti desgrasya.
Kabayatanna, inpetteng pay ni Atty. Castro a saan na a kayat a sawen a no menor de edad kangrunaan na iti agtawen ti 15-18 dagiti karaman iti pasamak ket saan da nga ammo ti ar-aramiden da gapo ta addan ti nakem dagitoy ken ammo dan ti mapaspasamak.
