LAOAG CITY – Nauram ti annex ti maysa a pagtaengan iti Barangay Bengcag ditoy ciudad ti Laoag.
Segun kenni Senior Fire Officer Glenn Mcneil Cabias iti Bureau of Fire Protection ditoy ciudad ti Laoag, itay 11:53 ket nakaawat da ti tawag nga adda ti maur-uram a pagtaengan isut gapo na a dagus da a nagresponde ket alisto a nasebseban ti apoy.
Inlawlawag na a ti nauram ket ti annex ti pagtaengan no sadinno ket naaramid babaen kadagiti light materials.
Mainaig iti daytoy, kunana a nakita ti agnagan ti Joseph a maur-uram ti pagtaengan ken nagtitinnulong dagiti residente a mangsebseb kabayatan a maiyur-uray dagiti bombero.
Kunana nga alisto a nagramram ti apoy gapo ta naangin ken karaman kadagiti nauram ket badbado ken dua a computer set.
Naamoan na a ti pagtaengan ket kukua ni Mr. Joel Bacud ken awan ti agnanaed ngem adda ti care taker a ni Mr. Elmer Tapia.
Kabayatanna, agtultuloy pay laeng ti imbestigasyon ti Bureau of Fire Protection no ania ti namunganayan ti uram nangruna ket awan met ti suplay ti kuryente iti daytoy ken awan ti agnanaed.
