LAOAG CITY – Inpasigurado ni Atty. Charito Malicad, Officer in Charge ti Business Permit and Licensing Office (BPLO) ditoy ciudad ti Laoag ti alisto a pannakaiproseso dagiti kasapulan a dokumento dagiti umili ditoy ciudad.
Segun kenkuana, no idi ket kasapolan pay laeng a maipan iti legal office dagiti dokumento nga ilaklakad dagiti umili iti opisinada para ti pannakaaprobar dagitoy, ita ket isunan a mismo ti mangaprobar kadagitoy.
Inbatadna nga inikkan isuna ni Mayor James Bryan Alcid ti bileg tapno aramiden daytoy ken tapno mausarna iti kina-abogado na.
Mainaig iti daytoy, kuna ni Malicad a rumbeng laeng a saan a pagur-urayen dagiti kliyente ti opsinada tapno saan sa met a maibayag.
Kunana a nasayaat no kastoy gapo ta imbes a maysa agingga iti dua nga aldaw sakbayda a maaala dagiti dokumento da, aguray da langen ti segundo tapno maala dagitoy.
Kabayatanna, inbatad ni Malicad a kitaen ken plastaren na amin daytoy tapno napinpintas met laeng ti maipaay a serbisio kadagiti umili ditoy cuidad ti Laoag.
