LAOAG CITY – Naiget a naglikudan ti Department of Justice nga adda ti ‘special treatment’ iti kontratista ni Sarah Discaya iti baet dagiti agsusukot a kaso na nga adda ti pakainaigan dagiti flood control projects anomaly.
Nagtalinaed ti takder ni Justice Spokesperson Atty. Polo Martinez nga awan ti ‘preferential treatment’ ken ni Discaya kalpasan a nagpakustodyar iti National Bureau of Investigation.
Iti agdama ket adda iti salinong ti ahensya ni Sarah Discaya kalpasan ti boluntaryo nga isusuko na, rason nga iti naiyuswat a ‘preliminary investigation’ iti sabali pay a kaso a sangsangwen na iti Malabon ket insistiran ken inkabil dagiti kameng ti National Bureau of Investigation iti prosecutor’s office.
Maipalagip a nagpila ti lokal a gobierno ti Malabon ti panaglabsing ti Republic Act 3019 wenno Anti-Graft and Corrupt Practices Act ken felony of theft kontra iti kontratista.
Nupay kasta, inlawlawag ni Justice Spokesperson Atty. Polo Martinez nga awan pay ti inparuk-at a ‘warrant of arrest’ kontra ken ni Sarah Discaya manipod iti korte nga akin-iggem kadagiti kaso a naipila kontra kenkuana nga adda ti pakainaigan iti ghost infrastructure project iti Davao Occidental.
Immunan a nagpila ti ‘graft’ ken ‘malversation’ ti Office of the Ombudsman kontra ken ni Sarah Discaya ken sumagmamano pay nga opisyal ti Department of Public Works and Highways iti Digos Regional Trial Court ti Davao Del Sur.
Daytoy ket dagus a naiyakar iti korte ti Malita, Davao Occidental ken kalpasan na ket naipan iti Regional Trial Court ti Lapu-lapu City, Cebu.
