LAOAG CITY – Umabot iti agarop 50 nga estudyante iti ili ti Bacarra ti naballaagan iti dua nga aldaw a panangmonitor ti pulisya iti panagmaneho dagiti menor de edad iti motorsiklo.
Segun kenni Police Captain Tolentino Erum, ti chief of Police ti Philippine National Police iti ili ti Bacarra, binagbagaan da dagtoy ken uray dagiti nagannak no sadinno no uliten da ket maisyuan ti ticket dagitoy.
Inlawlawag na nga iti laksid nga iparit ti pagadalan a sumrek dagiti estudyante a nakamotorsiklo ket mangaramid met ti wagas dagiti maseknan tapno maidulin da dagiti luglugan da.
Gapo iti daytoy, inulit manen ni Erum ti ballaag na kadagiti nagannak a saan da nga ipalubos nga agmaneho dagiti menor de edad nangruna ket agresibo dagiti maseknan iti daytoy a panawen.
Mainaig iti daytoy, binalakadan na pay dagiti barangay officials nga isuda ti maysa kadagiti katulungan da a mangsita ken ireport da iti PNP nangruna ket saan a mabalin a mangisyu ti ticket dagiti opisyal ti barangay.
Kabayatanna, kuna ni Erum a nagkiddaw da iti Land Transportation Office – Laoag a mangiyuswat ti lecture ken seminar kadagiti opisyales ti barangay ken tapno ma-deputized dagitoy.
