LAOAG CITY – Inpasigurado ti Partido Demokratiko Pilipino (PDP) a nakasagana da a tulongan ni Senador Ronald Dela Rosa iti aniaman a wagas ken gundaway.
Segun kenni PDP Deputy Spokesperson Ferdinand Topacio, ni Dela Rosa ket maysa kadagiti naisangsangayan a miembro ti partido kas opisyal ken maysa kadagiti tallo a senador a mangibagi iti grupo.
Gapo iti daytoy ket nakasagana ti PDP nga ipaay ti amin a tulong iti maysa a political party iti aniaman nga oras tapno matulongan ti senador iti agdama a sangsangwen na a parikot.
Inpetteng ni Topacio nga agtalinaed a solido ti suporta ti partido para kenni Sen. Bato.
Kabayatanna, kinondenar ni Topacio ti mamin-ano a daras a panangibaga ni Ombudsman Jesus Crispin Remulla nga addan ti arrest warrant kontra iti senador.
Innayon na a ti inaramid ni Remulla a panangi-leak ti mapapati nga arrest warrant manipod International Criminal Court (ICC) ket saan a nasayaat para iti soberanya.
