LAOAG CITY – Natnag ti maysa a mini tanker iti kanal iti Barangay Balaoi iti ili ti Pagudpud.
Nabigbig ti driver ti mini tanker nga agmaris ti puraw a ni Romeo Lumabao Castillo, agtawen ti 69, naasawaan ken residente ti Barangay Malasin iti ili ti Bangui.
Basar iti Pagudpud Municipal Police Station, dumaldalyasat ti mini tanker nga agturong nga agpa-amianan iti national highway ken idi sumang-at daytoy iti ngato a paset ti kalsada ket nakaturog ti driver.
Gapu iti daytoy, napukawan ti kontrol ti manibela ti driver a nangitunda ti pannakatnagna iti kanal nga adda ti kaunegna a maysa a metro.
Iti agdama, agtultuloy a matamtaming ti driver ti mini tanker kalpasan a nagsagaba ti sugat iti nagduduma a paset ti bagina iti Bangui District Hospital.
