LAOAG CITY – Naka-detain ti kontrobersial a contractor a ni Sarah Discaya idiay Lapu-Lapu City Jail kaduana ti walo a dadduma pay nga opisial ti Department of Public Works and Highways (DPWH) Davao Occidental.
Naammoan a ni Discaya ken dagiti padana nga akusado ket nagsisina a simmangpet idiay Mactan Cebu International Airport (MCIA) idi Disiembre 19 kalpasan ti warrants of arrest nga inparuk-at kadakuada ti Regional Trial Court (RTC) Branch 27 gapu iti pannakairamanda iti maanomalya a flood control projects idiay Davao Occidental.
Maipalagip a dua kadagiti walo a Department of Public Works and Highways engineers ket simmangpet iti agarup alas-3 ti malem idi Disiembre 19 nga insigida a naikabilda iti RTC Branch 27 iti Lapu-Lapu City Hall of Justice idinto a simmangpet met ni Discaya iti agarup alas-6 ti rabii a naikabil iti RTC Branch 27.
Nagbalin a naiget ti seguridad iti Hall of Justice iti panagsangpet ni Discaya.
Immuna iti daytoy, uppat kadagiti opisial ti Department of Public Works and Highways ket simmangpet iti nasao met laeng a korte iti agarup alas-7 ti rabii.
