LAOAG CITY – Marugyan ita ti panagbirok dagiti kameng ti Philippine Coast Guard ken Municipal Disaster Risk Reduction and Management Office iti ili ti Pasuquin iti mapukpukaw a mangalap.
Nabigbig ti mapukpukaw a mangalap a ni Christian Rebucal, agtawen ti 33 ken residente iti Sitio Dariqui iti Barangay Davila iti ili ti Pasuquin.
Segun kenni Ms. Kimberly Miedes, live-in partner ni Rebucal, parbangon iti Disyembre 20 idi napan iti baybay kadua na dagiti uppat pay a mangalap.
Inlawlawag na nga idi agawiden dagiti dadduma a mangalap ket inawis da ni Rebucal ngem intultuloy na pay laeng ti nagkalap ngem saanen a nakaawid.
Inbatad na nga idi Domingo ket nag-ring pay laeng ti cellphone ni Rebucal ngem saan da a nakasarita gapo iti kinakapsot ti signal.
Naamoan nga agmaymaysa ni Rebucal iti bangka na.
Mainaig iti daytoy, kuna ni Barangay Chairman Agbalog nga ita a marugyan ti search and rescue gapo ta marigatan dagitoy gapo ta nadawel ti dalluyon iti baybay.
Dinakamat na a nagsubli dagiti dadduma a mangalap iti rama a naudi a nakakitaan da kenni Rebucal ngem awanen daytoy idi nakadanon dan.
