LAOAG CITY – Naipaayan amin nga empleado ti gobierno probinsyal ti Noche Buena package.
Paset daytoy iti programa ti gobierno probinsyal a maipayaan ti ragsak dagiti empleado ita a panawen ti paskua.
Segun kenni Gob. Cecilia Araneta Marcos, maibilang amin dagiti empleado ti gobierno probinsyal a kapamilya isut gapo na a kalikagom na a maparagsak amin dagitoy.
Mainaig iti daytoy, inlawlawag na nga atiddog ti holiday isut gapo na a nasken nga usaren daytoy tapno makilangen kadagiti kapamilya da tapno ad-adda pay a naragsak.
Naamoan nga awan ti serrek iti trabaho dagitoy manipud intono Disyembre 27 agingga iti Enero 4.
Nagpanawagan kadagiti amin nga empleado a saan da nunay nga agin-inom ti nasanger kabayatan ti bakasyon tapno saan a maapektaran ti salun-at.
Kabayatanna, kiniddaw ni Gob. Marcos ken ni Human Resource Management Officer Mrs. Fe Siazon a mangidaulo ti Zumba iti iseserrek dagiti empleado intono tawen 2026 gapu ta sigurado nga adu ti ag-overweight iti daytoy a bakasyon.
