LAOAG CITY – Inpasigurado ti liderato ti Senado a maaprobaranen inton sumaruno a tawen ti nailungalong a gakat a mangbukel ti maysa nga Independent People’s Commission (IPC) a mangimbestigar kadagiti amin a maanomalya nga infrastructure project kadagiti ahensia ti gobierno.
Daytoy ket mainaig iti panagikkat iti puesto ti maysa kadagiti miembro ti Independent Commission for Infrastructure (ICI) a mangim-imbestigar kadagiti flood control project.
Inbatad ni Senate President Tito Sotto III a nagbalin a makumikom ti Senado ita a tawen gapu iti panangtalantan iti 2026 national budget isut gapuna a saanen a nairaman ti panangpatibker iti panangbukel ti Independent People’s Commission.
Inbatadna a naaramiden ti Independent Commission for Infrastructure ti pammilin nga imbestigaran dagiti karaman iti ghost at flood control projects anomaly ken naipaay metten iti Department of Justice ken Office of the Ombudsman dagiti nakalap a napapateg nga ebidensia.
Mainaig iti daytoy, maisupadi ti Independent Commission for Infrastructure iti Independent People’s Commission no sadinno a maikkan ti prosecutorial power, karebbengan a mangiyisyu ti subpoena ken patawan ti contempt ti maysa a testigo wenno resource person a saan a makitinnulong kadagiti imbestigasion.
Naammoan nga adda ti pammilin kadakuada a mangsuspeenso ken mangpa-freeze ti assets ti maysa nga indibidual a karaman tapno insigida a maduktalan ti money trail ken mangirekomendar ti hold departure order.
