LAOAG CITY – Inpasigurado ni Senate President Tito Sotto III a nakasagana ti Senado iti amin a posible a mapasamak iti impeachment case kontra ken ni Vice President Sara Duterte.
Daytoy ti inrakurak ni Sotto, ipasa man wenno saan ti Kamara de Representantes ti articles of impeachment ken no aramiden ti minority iti Senado a lappedan ti panag-convene ti impeachment court.
Kunana nga espekulasion pay laeng ti amin ngem aniaman ti mapasamak ket aramiden laeng ti Senado ti trabahoda.
Inlawlawag ti Senate President nga apaman nga isubmitir ti Kamara de Representantes dagiti articles of impeachment kontra ken ni Vice President Sara ket insigida nga ag-convene-da kas impeachment court.
Kuna pay ni Sotto a basar iti Konstitusion ket automatic ti panag-convene ti Senado kas korte no naawaten dagiti articles of impeachment ngem saanna a kayat a saoen nga insigida ti panangusig gapu ta adda ti proseso pay daytoy a pagdalanan sakbay a maiwayat ti mismo a trial.
