LAOAG CITY – Dinillaw ni dati a senador Antonio ‘Sonny’ Trillanes IV ti Independent Commission for Infrastructure (ICI) gapu iti maipagarop a pannakapaay na a mangimbestigar kada Davao City Rep. Paolo Duterte ken Senador Bong Go mainaig kadagiti alegasyon ti korapsiyon nga adda ti pakainaigan kadagiti proyekto ti flood control.
Iti maysa a post iti social media, inbatad ni Trillanes a masapol nga agserran ti Independent Commission for Infrastructure no agtultuloy a balewalaen na dagiti alegasyon kontra iti kongresista ken senador.
Segun ken ni Trillanes, ni Duterte ket saan a dimmalan kadagiti imbestigasyon uray adda ti P51 billion nga a budget insertions, idinto a ni Go ket saan man laeng a napaawagan iti baet dagiti alegasyon a nakairamanan ti pamilya na a kontrata nga agbalor ti minilyon a pisos manipod iti gobierno.
Maipalagip nga idi Oktubre, in-highlight ni Trillanes dagiti rakurak ti maysa a dati nga opisyal manipod iti Department of Public Works and Highways (DPWH) a nangibaga a naawat ti distrito ni Duterte ti P51 billion nga alokasyon para iti flood control projects ken ginutigot na dagiti imbestigador a suruten ti “paper trail” dagiti pondo.
Sinaggaysa pay ni Trillanes dagiti reklamo nga insumitir na iti Office of the Ombudsman kontra ken ni dati a Presidente Rodrigo Duterte ken ni Senador Go, a mangak-akusar kadakuada ti plunder ken graft.
Inbutaktak pay idi ni Trillanes a dagiti kompanya a kukua ti pamilya Go ket nakaala ti agarop P7 billion a kontrata manipod kadagiti proyekto ti Department of Public Works and Highways iti uneg ti sumagmamano a tawen, nga adda ti pakabuklan a 200 a proyekto.
Inpetteng ni Trillanes a ti panangipaay ti kontra kadagiti nasinged a kabagyan ket mailabsing iti linteg.
Immunan a naglikudan ni Cong. Paolo ti aniaman a pannakairaman na iti alegasyon ni Trillanes ken inawagan na ti Independent Commission for Infrastructure kas maysa a “propaganda factory” ti gobierno.
