LAOAG CITY – Inakusaran ti Thailand army ti Cambodia ti panaglabsing iti baro a pinirmaan a ceasefire agreement idi Sabado, Disiembre 27 kalpasan ti sumagmamano a lawas a rinnupak iti borders-da a nakatayan ti dinosdosena a tattao ken timmalaw dagiti sumurok maysa a milyon a residente.
Iti maysa nga statement, inbatad ti Thai army a maipagarup a nagpatayab ti Cambodia ti sumurok 250 nga unmanned aerial vehicles iti teritorioda idi rabii ti Domingo.
Kunana a dagitoy a tignay ket panangprobokar ken panaglabsing kadagiti addang a gagem a maalay-ayan ti tension a maiyataday iti napagtulagan a Joint Statement.
Gapu kadagiti baro nga alegasion, agpegpeggad ti pannakawaya-waya kadagiti suldado a Cambodian nga iggem ti Thailand a karaman iti katulagan no mapagtalinaed iti uneg ti 72 nga oras ti ceasefire sipod idi nagbalin nga epektibo daytoy.
Iti biang met ti Cambodia, inladawan laeng ni Foreign Minister Prak Sokhon ti drone incident kas maysa a bassit nga isyu nga adda ti pakainaiganna iti panangpatayab ti drones a nakita ti agpada a grupo iti border line.
Inlawlawagna a napagsaritaanen daytoy ti dua a pagilian ken immannugotda nga imbestigaran ken insigida a solbaren.
Nupay kasta, inpetteng ni Thai army spokesman Winthai Suvaree nga ipakpakita ti drone activity ti Cambodia ti agtultuloy a panangprobokar daytoy ken nakapsot a koneksion daytoy iti Thailand a makaap-apektar iti seguridad ti militarda ken dagiti sibilian nga adda kadagiti border areas.
Kabayatanna, iti panaglippas ti dua nga aldaw a panagsinnarita ti foreign minister ti Thailand ken Cambodia nga indauluan ti China idi Lunes iti Yunnan province, nangiyisyu ti statement ti tallo a pagilian a tinalantan dagiti addang tapno maminsan manen a maaddaan ti political mutual trust ken mapasayaat ti bilateral relations ti Cambodia ken Thailand ken mapagtalinaed ti kinatibker iti rehion.
Inpetteng ti Cambodia nga inallukoyna ti Thailand a makipaset iti baro a bilateral meeting iti Cambodia iti umuna a paset ti Enero inton sumaruno a tawen tapno talantanen ken ituloy ti survey ken demarcation work iti border.
