LAOAG CITY – Inbatad ti Bureau of Corrections (BuCor) a na-decongested iti 69 a porsiento dagiti pagbaludan ken penal facilities iti intero a pagilian.
Segun ken ni Bureau of Corrections director general Gregorio Catapang Jr., manipod iti dati a 356% ti congestion, naipababa da ti 69% isut gapuna nga adda laengen ti 287%.
Inpakaammo ni Catapang a ti pannakawaya-waya ti “record breaking” a 10,000 a persons deprived of liberty (PDLs) iti 2025 ti dakkel ti naitulong na tapno makissayan ti bilang dagiti nakapupuk kadagiti prison facilities.
Mainaig iti daytoy, inpakaammo ni Bureau of Corrections director general Catapang nga iti umuna a tallo a tawen ni President Ferdinand Marcos Jr. iti termino na ket agarop 18,000 a person’s deprived of liberty ti nawaya-wayaan kalpasan a naiserbi dan ti sentensya da idinto a 5 ribo dagiti naipaayan ti parole ken 4 a ribo ti naabswelto manipod kadagiti sangsangwen da a kaso.
Kabayatanna, inrakurak ni Catapang ti dandanin pannakaipatakder ti “Supermax” facility idiay Occidental Mindoro, a naiyalokaran ti P1.5 billion para iti 2026.
Innayon na a lukatan ti Bureau of Corrections ti “corrections academy” iti asideg ti Tanay, Rizal tapno matulungan dagiti balud a kayatna ti mangituloy ti panagadal na ket agbalin da a propesyonal.
