LAOAG CITY – Inrakurak ti Philippine National Police a generally peaceful ti panangselebrar ti baro a tawen iti baet nga adda dagiti report a pannakadangran gapu iti paputok, nadadael a sanikua ken insidente ti naiwawa a bala.
Inbatad ni Philippine National Police acting chief Police Lieutenant General Jose Melencio Nartatez Jr. nga adda ti nairekord a nadangran ngem nagtalinaed a naurnos iti pakabuklan a situasion.
Manipud idi Disiembre 16 agingga iti Disiembre 31, nakairekord ti Philippine National Police ti 11 a kaso ti indiscriminate firing ken lima nga insidente ti naiwawa a bala.
Iti panangrugi ti baro a tawen, lima a kaso pay ti indiscriminate firing ken dua nga insidente ti stray bullet ti nairekord a nakaarestaran ti 11 a suspek pakairamanan ti tallo a pulis.
Kabayatanna, inrakurak ti Department of Health a dumanonen iti 235 ti firecracker-related injuries iti intero a pagilian agingga ita a Biernes ti bigat, nababbaba ti 42% maidasig iti 403 a kaso iti napalabas a tawen.
Iti datos, 161 kadagiti biktima ket agtawen ti 19 ken agpababa ken ti kangrunaan a rason ti pannakadangran ket unknown firecrackers, boga ken five star.
Kuna ni Nartatez, agtultuloy latta ti panagbantay ti pulisia kabayatan a maiyur-uray ti panagsubli dagiti biahero kalpasan ti holiday break.
