LAOAG CITY – Dupudopen dagiti naruay a pasahero kadagiti nagduduma a bus terminal ditoy siudad ti Laoag kagiddan iti panaglippas ti holiday break.
Segun iti maysa kadagiti bus dispatcher, nasapa pay laeng itay bigat ket maobserbarandan ti arig awan ti patinggana a panagsangpet dagiti pasahero.
Inbatadna nga adda pay dagiti pasahero a naanus nga agur-uray iti baet a mabayag pay ti schedule dagitoy tapno laeng umunada a makalugan iti bus.
Kunana a kaaduan kadagiti pasahero ket agsubli idiay Baguio City, Cagayan ken Metro Manila.
Inlawlawagna a ti kangrunaan a rason ti nasapa a panagawid dagiti pasahero ket tapno maliklikan ti ad-adda pay a panagdudupudop dagiti tattao nangruna ket agsublin ti trabaho inton Lunes, Enero 5.
Innayonna a manamnama a manayonan pay ti bilang dagiti pasahero kabayatan ti umas-asideg a panagsubli iti trabaho dagiti mangmangged.
