LAOAG CITY – Mailibot ti replica ti Jesus Nazareno kadagiti nagduduma a barangay ditoy siudad ti Laoag inton malem.
Daytoy ket kas paset ti tinawen a panangselebrar ti fiesta ti Jesus Nazareno ita nga aldaw, Enero 9.
Segun ken ni Mrs. Minda Jacinto, akinkukua ti replica ti Jesus Nazareno ti Barangay Santa Joaquina ditoy siudad ti Laoag, mailibot ti replica ti Jesus Nazareno manipud mismo iti naipasdek a Chapel iti pagtaenganda ket rummuar daytoy a dumalyasat iti P. Gomez Street, magna iti paset ti Bacarra Road, lumabas iti Kapitolio Probinsial, dumagas iti Laoag City Hall agingga nga agsubli iti pagtaenganda iti Barangay 2.
Inbatadna a manamnama ti ginasgasut a deboto ti makipaset iti nasao nga aktibidad no sadinno nga adda pay ti aggapu iti sabali a lugar kas ti Isabela, Cagayan ken Cavite.
Inlawlawagna a mamati isuna nga adun ti napasamak a milagro kas ti panagarubos ti dara iti rupa ti replica ti Jesus Nazareno, pannakauram iti buok ken badona ken pannakatakaw ti replica ngem nabirukan idiay Bulacan.
Kunana a dakkel ti pammatina a gapu iti Jesus Nazareno ket nagimbag isuna iti sakitna a cancer ken nagsardeng ti panag-dialysis-na.
Inpaganetgetna a silulukat para iti amin para kadagiti mangayat a makipartisipar iti prosision aniaman ti relihion dagitoy.
Mainaig iti daytoy, inpasingked ni Retired Police Officer Rudy Ventura a nakikoordinardan ken ni Mayor James Bryan Alcid ken ti Laoag City Police Station – Traffic Division kas panangbayabay kadagiti agatendar a deboto.
Kabayatanna, naammoan a daytoyen ti maika-15 a tawenen a mangisaysayangkat ti prosision ti replica tunggal madanon ti fiesta ti Jesus Nazareno.
