LAOAG CITY – Naapektaran ti sumurok 300 a ribu nga ektaria ti bushland idiay Victoria, Australia gapu iti nalawa a bushfire kagiddan ti nakaro nga heatwave.
Basar iti Rural Fire Service, sumagmamano nga uram nga asideg iti border ti Victoria iti New South Wales ti addan iti emergency level a kangatoan nga alert level nga immabot iti 40 degrees Celsius a temperatura.
Segun kadagiti otoridad, naapektaran ti sumurok 130 nga istruktura pakairamanan dagiti pagtaengan no sadinno a nairaman pay ti 38 a balay ken negosio a napukawan ti kuriente gapu iti bushfire.
Daytoy ti maibilang a kakaroan nga uram iti pagilian sipod idi 2019 agingga iti 2020 Black Summer fires nga adda ti kalawana a kadakkel ti Turkey ken nakatayan ti 33 nga indibidual.
Nagballaag ni Prime Minister Anthony Albanese a sumangsango ti Australia iti maysa nga aldaw nga “extreme ken dangerous” fire conditions partikular iti Victoria a dakkel a paset ti estado ti naideklarar a disaster zone.
Gapu iti daytoy, napaserraan dagiti adu a parke ken campground iti Victoria ken insigida a naibilin ti panangibakwit kadagiti residente iti lugar.
Kabayatanna, inpakaammo ti Australian Weather Bureau nga agtultuloy ti heatwave warning iti dakkel a paset ti Victoria ken aktibo met ti fire weather warnings kadagiti naruay a lugar iti pagilian pakairamanan ti New South Wales.
