LAOAG CITY – Kwinestyunaran ti abogado ti negosyante a Charlie “Atong” Ang ti inparuk-at a warrant of arrest ti Regional Trial Court iti Sta. Cruz, Laguna mainaig iti kaso dagiti mapukpukaw a mammallot.
Segun ken ni Atty. Gabriel Villareal, ti desisyon ket “premature” ken “legally questionable” gapu ta maipagarop a naibasar laeng daytoy iti saan a kompleto nga impormasyon manipod iti Department of Justice.
Inpetteng na a linabsing ti korte ti karbengan ni Ang gapu ta saan nga inraman ti counter affidavits ken ebidensiya a pabor kadagiti akusado.
Innayon ni Villareal a ti laeng testimonya ni Julie “Dondon” Patidongan ti inusar ti Department of Justice nga ibilang na a pudno a mastermind ti krimen.
Inpasigurado ti abogado a respetaren ni Ang ti proseso ti korte ngem usaren da ti amin a legal a remedy tapno kwestyunaren ti arrest order.
