LAOAG CITY – Inpakaammo ni Atty. Carlos Isagani Zarate, dati a Bayan Muna Representative a ti complainant ti impeachment ni Presidente Ferdinand Marcos Jr. a ni Atty. Andre De Jesus ket dati nga abugado ni dati a First Lady Imelda Marcos.
Gapu iti daytoy, masdaaw ni Atty. Zarate no apay a naaramid ni Atty. De Jesus a mangipila ti impeachment complaint kontra ken ni Presidente Marcos.
Segun kenkuana, nasken a dumalan nga umuna iti Kamara de Representantes sakbay a denggen ti Senado ti impeachment complaint.
Inbatadna a basar iti 1 year bar rule a no adda ti pending a maysa nga impeachment complaint ket saanen a mabalin pay nga agipila ti sabali manen nga impeachment complaint kontra iti agpada nga impeachable official.
Inlawlawagna nga adu dagiti mangibagbaga a nakapsot ti naipila nga impeachment complaint kontra ken ni Presidente Marcos.
Kunana a mapadpadaanan nga adda ti sabali pay nga impeachment complaint kontra iti Presidente nga ipila ti civil society organization ken peoples organization a posible nga iendorso met ti Makabayan Bloc.
Mainaig iti daytoy, kuna ni Atty. Zarate a masapul nga iendorso ti Secretary General ti impeachment complaint iti Office of the House Speaker.
Innayonna a saan daytoy nga umannugot a maysa kadagiti ground ti impeachment complaint kontra ken ni Marcos ket ti pannakaikabil ni dati a Presidente Rodrigo Duterte iti International Criminal Court gapu ta mamati isuna a ti inaramid ni Marcos ket maiyataday iti Konstitusion.
