LAOAG CITY – Mamati ni Atty. Carlos Isagani Zarate, Human Rights lawyer a ti naglabas nga 12 nga aldaw nga impeachment trial ni Vice President Sara Duterte ket dakkel ti puntos nga impakita iti biang ti prosekusion.
Segun kenkuana, ti nagbalin a testimonia dagiti testigo nga opisial ti banko ken dagiti dokumento a naiprisintar iti paangdengngeg nga adda ti pirma ni Vice President Sara Duterte pakairamanan dagiti findings ti Commission on Audit iti Office of the Vice President ken Department of Education ket limmamang ti prosekusion.
Inbatadna a basar iti nagbalin nga imbestigasion ti Commission on Audit iti Office of the Vice President ken ti Department of Education ket naduktalan a saan a nasurot dagiti nasao nga opisina ti umno a paangigasto ti confidential funds.
Naobserbaranna a ti panangiprisintar ti prosekusion kadagiti ebidensia iti Article 1 ket saanna a kayat a saoen puntiryada ti bise no diketdi kalikagumda laeng a paneknekan nga adda ti panaglabsing iti linteg ti nasao nga akusado kas iti sangsangoenna a betrayal of pulic trust a maysa a violation iti kostitusion.
Inpettengna a ti panaglabsing ti maysa nga agpanpanday linteg iti konstitusion ket masapol nga agsungbat a segun kenkuana, imbes a dagiti agpanpanday linteg ti mangipatungpal ti panangsurot kadagiti pagannurotan ket maipagarup isuda pay ti umuna nga aglabsing iti bukodda a binukel a linteg.
Inpettengna a dagiti rinibo a dokumento ken ado a testigo kontra ken ni VP Sara ket maysa a mangpaneknek a ti maysa nga akusado ket naglabsing.
Nu pay kasta, inbatadna a bayat a narimaan pay laeng ti impeachment trial ket awan pay ti pinal a desision ken no aniaman ti agbalin a desision dagiti senator-judges ket masapol a respetaren daytoy dagiti agsinnumbangir a partido.
Kabayatanna mainaig iti daytoy, ginutigot ni Atty. Zarate dagiti nakatutok iti impeachment trial a masapol nga ti tunggal Pilipino ket adda ti biangna iti impeachment proceedings gapu ta paset daytoy ti pannaka-ammo kadagiti opisial a pudno nga adda ti biangna kadagiti Pilipino.
