LAOAG CITY – Naipatungpal ti reshuffling dagiti Chief of Police ditoy Ilocos Norte.
Segun ken ni P/Col. Joemar Labiano, Provincial Director ti Ilocos Norte Police Provincial Office, naipatungpal ti reshuffling dagiti opisial kangrunaanna iti ili ti Adams, Pagudpud ken ditoy siudad ti Laoag para iti strategic, administrative ken gagem a mapasayaat pay ti organizational efficiency ken panangpapintas ti career development.
Inbatadna a ti baro nga Officer-In-Charge iti Laoag City Police Station ket ti dati a Deputy Provincial Director for Operations (DPDO) a ni Police Lieutenant Colonel Ryan Retotar.
Kunana a ni Police Captain Bjay Caliboso ti baro nga Officer-In-Charge ti Pagudpud Municipal Police Station idinto a ni Police Captain Jhan Lay Apostol ti baro met nga Officer-In-Charge ti Adams Municipal Police Station.
Inlawlawagna a ni Police Major Joseph Bantullay ti agserbi kas Acting Chief ti Provincial Community Affairs and Development Unit (PCADU).
Mainaig iti daytoy, inpakaammo ni P/Col. Labiano a ti dati nga Hepe ti Laoag City Police Station a ni Police Lieutenant Colonel Andrew Rabang ket agserbi iti Deputy Provincial Director for Operations, ti dati nga Hepe ti Pagudpud Municipal Police Station a ni Police Major Carlo Abing ket agserbi kas Chief of Tourists Police Unit (TPU), ken ti dati nga Hepe ti Adams Municipal Police Station a ni Police Captain Aimee Laggui ket agserbi kas Finance Officer.
Kabayatanna, daytoy a reshuffling ket maysa a masansan nga ar-aramiden kadagiti ahensia ti gobierno, militar ken mangipatpatungpal ti linteg tapno masigurado dagiti tauhan ket adda iti husto a posision.
