LAOAG CITY – Mamati ni Sen. JV Ejercito, Sponsor ti Universal Health Care ditoy pagilian a dakkel a makaapektar iti gagem ti Universal Health Care ti Medical Assistance for Indigent Patients.
Inbatadna a napintas ti Medical Assistance for Indigent Patients idi saan pay unay a na-develop ti Universal Health Care ngem ita nga immadu ti sakup ti Universal Health Care ket basbassit koma ti pundo ti nasao a programa.
Inlawlawagna a ti Universal Health Care ket kalikagumna a saanen a makumikom pay dagiti tattao a mapan agsarak ti agbayad ti hospital bill-da wenno saanda a masapul a mapan iti Philippine Amusement and Gaming Corporation wenno PAGCOR, Philippine Charity Sweepstakes Office wenno PCSO ken kadagiti pulitiko.
Kunana a babaen ti Universal Health Care ket mapagbalin nga specialty center dagiti nagduduma nga ospital kas ti Mariano Marcos Memorial Hospital and Medical Center iti siudad ti Batac.
Mainaig iti daytoy, maragsakan ni Sen. Ejercito nga ita a tawen ti kadakkelan ti naipaay a pundo iti PhilHealth ken Universal Health Care.
Gapu iti daytoy, inpettengna nga adu dagiti posible a maestablisar kangrunaanna ti Mariano Marcos Memorial Hospital and Medical Center, Lung Center ken Heart Center ken saanen a masapul pay a mapan iti adayo a lugar dagiti taga probinsia.
