Pormalen a nagsapata ni Associate Justice Rodil V. Zalameda kas maika-28 a Chief Justice ti Korte Suprema iti naisayangkat nga oath-taking ceremony iti Supreme Court En Banc session hall ita nga aldaw ti Biernes, Nobiembre 6, 2026.
Indauloan ni Senior Associate Justice Marvic Leonen ti panagsapata ni Zalameda kalpasan nga opisial a dinutokan daytoy ni Presidente Ferdinand Marcos Jr. iti kangatoan a posision iti ukoman ti pagilian.
Sukatan ti baro a mangidadaulo ti Korte Suprema ni dati a Chief Justice Alexander Gesmundo a pormal a nagretiro ita nga aldawa kalpasan ti naikeddeng a panawen a panagserbina iti Korte Suprema.
Sakbay iti panagbalin a Chief Justice, ni Zalameda ket immuna a simrek iti Korte Suprema kas Associate Justice idi Agosto 6, 2019 kalpasan daytoy a dinutukan ni dati a Presidente Rodrigo Duterte.
Nagserbi pay daytoy kas Associate Justice ti Court of Appeals iti uneg ti 11 a tawen no sadinno nagbalin a mangidaulo iti 17th Division na daytoy, malaksid pay iti nagbalin experience kas Branch Clerk of Court iti Regional Trial Court ti Makati.
Nangrugi iti atiddog a karerana iti pampubliko a panangusig idi 1995 aginga a nadutokan kas City Prosecutor ti Mandaluyong idi 2002, kalpasan ti lima a tawen ti pribado a panagsanay ti abogasia manipud 1990 agingga 1995.
Nagturpos ti Chief Justice ti Bachelor of Laws iti Ateneo de Manila University idi 1987 ken pimmasa iti Bar Examinations idi 1988.
Kabayatanna, manamnama nga idaloan ni Zalameda ti ukoman nga adda natibker nga integridad ken dedikasion iti hustisia.
