LAOAG CITY – Nakasaganan ti House Committee on Justice a talantanen ti aniaman a reklamo ti impeachment kontra kadagiti nangangato nga opisial.
Inbatad ni Batangas Rep. Gerville “Jinky Bitrics” Luistro, Chairperson ti komite, aramidenda ti responsibilidadda nga alisto ken addaan ti maiyannatop a panagannad.
Iti maysa a forum idiay Quezon City, inpetteng ni Luistro a ti impeachment ket maysa nga “extraordinary power” a maipapaay kadagiti sovereign people tapno maikkat ti maysa a nagbasol nga opisial.
Gapu iti daytoy, mamati isuna a nasken daytoy a solbaren nga awan ti pannakaitantanna ken naiget a pannakatingitingna.
Nangiparuk-at ti rakurak ti komite iti baet ti maipanggep kadagiti impeachment complaint kontra ken ni Presidente Ferdinand “Bongbong” Marcos Jr.
Nupay kasta, inlawlawag ni Luistro a nakadepende ti amin iti umiso a proseso.
Iti agdama, iyur-uray pay ti pormal a tignay manipud iti Office of the Secretary General nga isuna ti umuna nga umaw-awat kadagiti reklamo sakbay daytoy nga i-refer iti plenario ken iti komitena.
Kuna ni Luistro a mabalin a naaddaan ti apagapaman a pannakaitantan iti panagproseso gapu ta adda iti opisial a biahe idiay Taiwan ni Secretary General Atty. Cheloy Velicaria-Garafil idi naipila dagiti sumagmamano a reklamo.
Inpetteng ti agpanpanday linteg nga irespetarda ti diskresion ken hurisdiksion ti opisina ti Secretary General iti panangawat dagiti nasao a dokumento.
