LAOAG CITY – Nagpanawagan ti Malacañang ti panagkaykaysa iti baet ti maipapan ti impeachment kontra iti dua a kangatoan nga opisial ti pagilian para metten iti kinatalged ti Pilipinas.
Inbatad ni Palace Press Officer Undersecretary Claire Castro, napateg ti panagkaykaysa tapno mapagtalinaed a natalged ti pagilian ken saan a maapektaran ti talek ti publiko ken dagiti agpuunan.
Inlawlawagna nga agtultuloy ti panawagan ti gobierno nga agtalek dagiti umili ken ni Presidente Ferdinand Marcos Jr. kagiddan ti namnama nga agtalinaed ti kumpiansa dagiti investor iti pagilian.
Mainaig iti daytoy, inpetteng manen ni Castro a nakasagana ti Presidente a sangoen ti impeachment case kontra kenkuana.
Kunana nga awan ti linabsing a linteg ti Presidente ken awan ti inaramidna nga impeachable offense.
Innayon ti Malacañang nga agtultuloy a nakatutuk ti administrasion kadagiti programa a pang-ekonomia ken pagtrabahoan iti baet ti mapaspasamak iti maipapan ti pulitika.
