LAOAG CITY – Nakisosyo ti gobierno probinsial ti Ilocos Norte iti JoyRide Philippine Corporation, maysa nga information technology firm a mangpatpataray iti online ride-hailing platform, tapno mangidiaya ti taxicle services ditoy probinsia.
Iti babaen ti partnership, mabalin nga asidegen nga ag-book dagiti commuters iti tricycle rides babaen ti JoyRide app kalpasan ti pannakapirma ti memorandum of agreement iti nagbaetan ti gobierno probinsial ken ti kompania.
Maipalagip nga idi Lunes ket inaprobaran ti Sangguniang Panlalawigan ti maysa a resolusyon tapno palubusan ni Governor Cecilia Araneta-Marcos a makipinnirma ti Memorandum of Agreement iti nagbaetan da iti Joyride, nga inbagian ti bise presidente na para iti Business Development for Mobility, a ni Menard Takayasu Umali, para iti operasion ti JoyRide taxicle services iti Ilocos Norte.
Kabayatan ti deliberasion, kuna ni Provincial legal counsel Juan Alfonso Jose nga eksklusibo nga usaren dagiti drayber ken operator dagiti traysikel nga aktibo a kameng ti konseho ti Metro Ilocos Norte ti app.
Inpasigurado na nga awan ti malabsing kadagiti pagannurotan ti city wenno municipal franchises iti panangusar iti app.
Iti pannakitinnulong kadagiti lokal a gobierno ken JoyRide, ti probinsia ket ipinpinal nan ti fare matrix, nga addaan iti standard flag-down rate a naikeddeng iti P45.
Immuna a nangisayangkat ti JoyRide iti maysa a bulan a pilot test ditoy ciudad ti Laoag ken dagiti asideg nga ili idi 2023, no sadinno a kabayatan daytoy ket nagpasar dagiti nakipaset a drayber iti public safety training.
Nakikadua met ti kompania iti Malayan Insurance tapno mangipaay iti insurance coverage para kadagiti driver ken pasahero.
