LAOAG CITY – Ipatulod ti White House ni border czar Tom Homan iti Minneapolis.
Daytoy ket kalpasan iti mapaspasamak a riribuk gapu iti pammaltog dagiti Immigration Customs Enforcement (ICE) a nakatayan ni Alex Pretti.
Inbatad ni White House press secretary Karoline Leavitt nga iti baet nga adda ti napasamak a pammaltog ket itultuloyda latta ti nalawa a deportation.
Inpasingkedna nga adda ti naiget nga imbestigasion nga iwayat dagiti otoridad mainaig iti nasao a krimen.
Inpettengna a kalikagum ni United States President Donald Trump a naan-anayen a malpas ti riribuk iti Minnesota.
Naaddaan ti panagsinnarita iti telepono da Trump ken Minnesota Governor Tim Walz no sadinno a maipagarup nga immannugoten ni Trump a kissayan ti bilang dagiti Immigration Customs Enforcement agents.
