LAOAG CITY – Naarestar ti maysa a menor de edad a lalaki kalpasan a naalaan ti naruay a balbala ti paltog iti Barangay 6, San Leandro iti ili ti Sarrat.
Segun ken ni P/Capt. Ashley Cacayorin, Hepe ti Sarrat Municipal Police Station, ti menor de edad ket agtawen ti 16, construction worker iti ili ti Vintar ken residente ti Barangay Albano iti ili ti Dingras.
Inbatadna a kabayatan iti panangiwayat ti checkpoint operation iti Sarrat-Vintar road dagiti otoridad ket naobserbaranda nga awan ti plate number ti motorsiklo ti menor de edad.
Gapu iti daytoy, pinagsardeng ti pulis ti menor de edad kagiddan iti panangbiruk ti driver’s license ken dagiti dokumento ti naglugananna a motorsiklo ngem awan ti naipakitana kadagiti pannakabagi iti linteg.
Nupay kasta, apaman a kauten ti menor de edad ti bulsana ket ditoy a nakita ti pulis ti maysa a naka-box a naikabil iti ice bag a naglaon ti 31 a pedaso ti bala ti calibre 22.
Inlawlawagna a ti palawag ti menor de edad kadakuada ket inyawat laeng ti foreman kenkuana dagiti nakumpiskar a kontrabando ken mapanna i-deliver dagitoy iti maysa nga indibidual iti ili ti Sarrat.
Kunana a malaksid kadagiti naala a balbala manipud iti menor de edad ket awanen ti nakita pay a sabali nga iligal a banag dagiti otoridad.
Inpettengna a ti akinkukua ti motorsiklo a nagluganan ti menor de edad ket ti guardian daytoy.
Innayonna a nakikoordinarda iti Dingras Municipal Police Station tapno maammoan ti naan-anay pay nga impormasion maipanggep iti pakabigbigan ti menor de edad.
Naammoan a nagsinan ti nagannak ti menor de edad ken awan ditoy Ilocos Norte dagitoy.
Iti agdama, nagtalinaed iti Sarrat Municipal Police Station ti nasao a menor de edad.
