LAOAG CITY – Maibilang ti gobierno probinsiyal a kaunaan a mangipatungpal ti National ID Authentication Service Integration with the Centralized Assistance Information System.
Daytoy ket kalpasan a nagpinnirma iti Memorandum of Agreement ti gobierno probinsial iti panangidaulo ni Governor Cecilia Araneta Marcos kaduana ni Mr. Paul Calamaan, ti mangidadauli ti Information and Technology Office ken ti Philippine Statistics Authority babaen kada Assistant Secretary Rosalinda Bautista, Atty. Henedine Palabras, Officer-in-Charge, Assistant National Statistician of Fraud Management and Client Management Service.
Inimatangan met daytoy dagiti sumagmamano a mayor iti probinsia, pannakabagi dagiti sumagmamano a Local Government Units ti Ilocos Norte ken sumagmamano a department heads ti gobierno probinsyal.
Iti panangipaay ni Governor Marcos ti mensahe na, indanun na ti napalaus a panagyaman na iti Philippine Statistics Authority kangrunaanna kada Assistant Secretary Bautista ken Atty. Palabras iti panangpili da ti Ilocos Norte nga umuna a probinsia a kabinnuligda a mangipatungpal iti nasao a programa.
Inbunannag na a daytoy a panagkinamayet ti gobierno probinsyal ken ti Philippine Statistics Authority ti mangpatibker iti panagtinnulong a mangpasayaat iti serbisio a maipapaay kadagiti umili.
Inbatad na a dakkel ti akem ti National ID System iti nasaysayaat, nataltalged ken al-alisto a pannakaipatungpal ti serbisio ti gobierno.
Inpatalged na pay a babaen iti nasao a programa ket maipasigurado a dagiti maiyannatup a tattao ti pakaipaayan dagiti serbisyo ti gobierno.
Innayon na a no agtinnulong ti gobierno nasional ken ti gobierno local ket ad-adda pay nga epektibo dagiti programa ken naan-anay a marikna dagiti umili ti serbisio ti gobierno.
Kagiddan iti daytoy, ginutigot ti gobernador ti lokal a gobierno ditoy ciudad ti Laoag a mangipatungpal iti nasao a programa tapno dagitoy met ti agbalin a kaunaan a siudad iti intero a pagilian a makikammayet iti Philippine Statistics Authority iti pannakaipatungpal ti nasao a programa.
