LAOAG CITY – Ilunglungalong ti Senate Committee on Social Justice, Welfare, and Rural Development ti nalawa a reporma iti panagibunong ti ayuda ti gobierno, karaman ti panagkissay kadagiti dokumento a kidkiddawen ken pananglapped iti pannakibibiang dagiti pulitiko iti proseso.
Iti panagdengngeg ti komite, inbatad ni Chairperson Senador Erwin Tulfo a gagem ti nailungalong a gakat a pagbalinen a permanente ti Assistance to Individuals in Crisis Situation (AICS) ti Department of Social Welfare and Development (DSWD), ken kagiddan iti daytoy ket pagbalinen a simple ti wagas iti panagala ti tulong.
Naipalaon iti gakat a dua a kangrunaan a dokumento laeng ti kasapulan dagiti benepisyaryo, partikular iti medical assistance: maysa a valid Identification Card (ID) ken ti usto nga hospital bill wenno medical record.
Target daytoy nga ikkaten dagiti requirement kas ti Certificate of Indigency, barangay clearance, notarized affidavit, Social Case Study Report, ken uray ti marriage certificate iti sumagmamano a klase ti tulong.
Basar iti senador, ti agdama a sistema ket saan laeng a nabayag no di ket agbalin pay a wagas iti panagpul-pulitika, gapu ta mapilitan a dumalan dagiti agkasapulan iti barangay para iti indigency certificate, maysa a dokumento a masansan nga adda ti nagan ken ladawan dagiti lokal nga opisyal.
Dinakamat pay ti komite a ti kastoy a sistema ket mangipaay kadagiti benepisyaryo it alanganin, aglalo iti tunggal panawen ti eleksyon nga agbalbalin a sensitibo ti panagibunong ti tulong-pinansyal.
Kinumpirmaran met ti Department of Social Welfare and Development a no mapagbalin a naan-anay a linteg ti gakat, plano na a padur-asen ti Assistance to Individuals in Crisis Situation kas maisina a bureau tapno mapasayaat ti pannakaimanihir, staffing, ken implementasyon ti programa iti intero a pagilian.
Kagiddan iti daytoy, ginutigot ni Tulfo ti Department of the Interior and Local Government (DILG) nga iyalisto ti panangpaiget ti pannakaipatungpal dagiti pagannurutan a mangipawil iti presensya dagiti pulitiko iti panagibunong ti ayuda, kas maiyataday iti 2026 General Appropriations Act.
Kabayatanna, kas sungbat ket nangiparuk-at ti Department of the Interior and Local Government ti Memorandum Circular No. 2026-066 a naan-anay a mangipawil iti panagikabil ti nagan, ladawan wenno aniaman a pakabigbigan dagiti opisyal ti gobyerno kadagiti programa a ponpondoan ti gobierno.
