LAOAG CITY – Maragsakan ni United Nations Secretary-General Antonio Guterres ti inaramid a panagsinnarita ti Estados Unidos ken Iran tapno makissayan ti nuclear tension.
Nagyaman daytoy kadagiti opisial ti Oman gapu ta isuda ti nangidiaya nga isayangkat ti panagsinnarita iti nasao a pagilian.
Maipalagip a naaddaan ti panagsinnarita dagiti pannakabagi ti Amerika ken Iran no sadinno nga ibilang ti kaadoan a maysa a napintas a rugi daytoy.
Naammoan a dagiti sumagmamano a pagilian kas iti Qatar ken Turkiye ti agpanpanawagan ti panagsarita tapno maliklikan ti aniaman a panangiwayat ti riribuk.
Immunan a nagpangta ni United States President Donald Trump a saanda nga agpangadua a rauten ti Iran no ipettengna a saan daytoy a makisarita ken isardeng ti panagaramid kadagiti nuclear weapons.
