LAOAG CITY – Inpasingked ni House Justice Committee chairperson ken Batangas Rep. Gerville Luistro a mabalin pay ti agpila ti nayun nga impeachment complaint kontra ken ni Vice President Sara Duterte.
Daytoy ket kabayatan a saan pay a naisumitir ti House plenary ti dua nga impeachment complaint iti idaulwan na a komite.
Iti maysa nga interview, nasaludsud ken ni Luistro maipanggep iti maysa pay a baro a reklamo kontra iti bise presidente a possible a maipila intono lunes (Pebrero 9), sumagmamano nga aldaw kalpasan nga insumitir ti House Secretary General ti dua a reklamo iti Office of the Speaker of the House.
Inlawlawag ti agpanpanday linteg nga agingga a saan pay a naisumitir iti komite na ket mabalin paylaeng nga awaten ti Kamara de representantes dagiti reklamo, gapu ta saan pay a mangrugi ti one-year prohibition period
Innayon na a makumpleto ti initiation process no nai-refer ti plenaryo ti impeachment complaint iti Justice Committee ken iti dayta metlaeng nga aldaw ket marugyan ti pannakaipatungpal ti ban.
Iti babaen ti House Rules, adda ti sangapulo a session days ti Office of the Speaker tapno iraman ti reklamo iti Order of Business.
No mapasamak daytoy, masapol a naan-anay met a mairefer ti reklamo iti Justice panel iti uneg ti tallo a session days.
Kabayatanna, saan met nga iwalin ti agpanpanday linteg ti posibilidad a suportaran ti nasurok a 1/3 dagiti miyembro ti Kamara de representantes ti maysa pay a reklamo, tapno mapaalisto ti pannagna daytoy kas ti napasamak iti 2025 complaint kontra ken ni Vice President Duterte.
Nupay kasta, kuna na a masapol a mapasamak daytoy sakbay pay a mairefer iti komite na ti dua nga immuna a reklamo nga agdama nga adda iti opisina ni Speaker Faustino Dy.
