LAOAG CITY – Agur-uray ti 800 a ribu a pisos a gunguna ti agkampeon iti Ilocano Festival of all Festivals ita a tawen 2026.
Inpakaammo ni Mr. Aianree Raquel, Provincial Information Officer nga umawat met ti makagun-od iti maikadua a gunguna iti 500 a ribu a pisos idinto a 300 a ribu a pisos iti maikatlo a gunguna.
Malaksid iti daytoy, inlawlawagna nga 400 a ribu a pisos ti ipaay ti Provincial Government of Ilocos Norte a “subsidy” ita a tawen.
Inbatadna a daytoy ti kadakkelan pay laeng a subsidy nga ipaay ti gobierno probinsial kadagiti contingent ti Tan-ok ni Ilocano Festival of all Festivals.
Kunana a 22 dagiti makipartisipar a contingent ita a tawen gapu ta saan a makipartisipar iti ili ti Sarrat gapu ta nairana a Pebrero 28 ti Tan-ok a kaaldawan ti panagfiesta iti ili ti Sarrat.
Inlawlawagna a ninayonan ni Gov. Cecilia Araneta Marcos iti 300 a ribu a pisos ti dati a maipapaay a subsidy a 100 a ribu a pisos.
Mainaig iti daytoy, mamati ti Provincial Tourism Officer a daytoy ti nanggutigot kadagiti contingent nga agsagana a naimbag para iti Tan-ok ita a tawen.
Kabayatanna, inpakaammona a manamnama a naruay dagiti national officials nga umay agbuya iti Tan-ok ita a tawen 2026.
Nupay kasta, kunana a ti kapatgan ket ti kaadda dagiti naiget a mangsupsuporta iti Tan-ok.
