LAOAG CITY – Kinumpirmaran ti Russia ken Ukraine a makipasetda iti sabali manen a panagsinnarita maipapan iti kinakappia.
Naikeddeng ti maikatlo nga United States-mediated peace talks manipud inton Pebrero 17 ken 18 iti Geneva.
Addan ti dua a peace talks ti naisayangkat idiay Abu Dhabi ngem ita ket umuna a gundaway a maiyuswat daytoy iti Europa.
Atendaran daytoy dagiti pannakabagi dagiti pagilian a Russia, Ukraine ken Estados Unidos.
Naammoan a kadagiti naglabas a peace talks ket nagtulagda a saan pay laeng a mangiwayat ti panangatake kadagiti energy infrastructures idinto nga iti maikadua a panagsinnarita ket naaddaan met ti panagsinnukat ti hostage.
Maipalagip a namin-adu a daras nga inrakurak ni United States President Donald Trump a kalikagumna a malpasen ti riribuk iti nagbaetan ti Russia ken Ukraine ti agarup uppat a tawen.
