LAOAG CITY – Kinumpirmaran ti Department of Justice a ‘submitted for resolution’ a ti reklamo a ‘malversation’ a sangsangoen ni dati a Sen. Bong Revilla Jr.
Daytoy mismo ti inpakaammo ni Atty. Polo Martinez, pannakangiwat ti nasao nga ahensia mainaig iti reklamo.
Tingitingen a naimbag ti prosekusion ti saan pay a pinal a resolusion tapno maammoan no ania nga addang ti aramiden iti reklamo.
Posible a maiparuk-at ti resolusion ken desision daytoy nga ipila kas kaso ti nasao a reklamo wenno ibasura ken saanen nga iyuli iti maseknan a korte.
Inbatad ni Atty. Martinez a ti ‘malversation case’ kontra iti dati a senador ket adda ti pakainaiganna iti maanomalya a proyekto a konektado iti kompania nga SYMS Construction Trading.
Inlawlawagna a karaman ti reklamo iti umuna a bansada ti lima a kaso a naipila iti Department of Justice.
Kunana a tallo kadagitoy ket manarimaan a pending for release idinto a ti malversation complaint kontra ken ni dati a Sen. Revilla ket addan iti pending review.
Inpettengna a saan pay a masinunuo no ania a petsa a rummuar ti pinal a resolusion ti prorekusion mainaig iti reklamo.
