LAOAG CITY -Naaprubaran iti maikadwa ken maudi a pannakaibasa ti maysa a resolusyon iti konseho ditoy ciudad ti Laoag.
Naipalaon iti nasao a resolusyon ti panagkiddaw ti tulong iti SM Supermalls Corporate Social Responsibility Arm ken SM Cares babaen ti koordinasyon iti Department of Social Welfare and Development, National Council of Disability Affairs ken Autism Society of the Philippines, tapno mangipasdek ti “Sensory Lab” wenno dadduma nga inclusive Wellness Amenity iti similar nature iti SM City Laoag para kadagiti ubbing ken nataengan nga addaan iti Sensory Processing Challenges, Autism Spectrum Disorder, Anxiety ken dadduma a kapada a kondisyon.
Segun iti counterpart ni Konsehal John Michael Fariñas a ni Junior Official Kristina Francisco, daytoy ket dakkel a banag a makatulong kadagiti addaan kadagiti nasao a kondision.
Kunana a basar iti datos iti Persons with Disability Affairs Office ditoy ti Laoag, adda iti 3,780 a Persons with Disability iti ciudad no sadinno nga 400 ditoy ket ubbing.
Inbatadna a dagiti indibidual nga agpaspasar ti kastoy a kondision ket kasapolan da iti environment a mangsuporta ken mangrespetar iti kasasaad da .
Mainag iti daytoy, kunana a babaen iti daytoy ket ad-adda a matulungan dagitoy a maaddaan iti natalged a lugar a papanan ken pakaadaptaran wenno pakasusurwan da kadagiti nagduduma nga adal.
Naamoan nga iti laeng SM Mall of Asia iti addaan ti Sensory Lab ditoy pilipinas ngem no bilang maaprobaran ditoy ciudad ti Laoag ket as-asideg laeng ti pagturungan dagiti kabangibang a lugar.
