LAOAG CITY – Umabot iti nasurok a 5,000 a flights ti rumuar ken sumrek iti Estados Unidos ti nakanselar gapu iti nakaro nga snow storm.
Malaksid iti daytoy, ginasut a ribo a tattao ti napukawan ti suplay iti kuryente gapu iti nasao a sitwasyon idiay Amerika.
Inpakaammo ti National Weather Service a ti kadakkelan a paset ti US east coast ket umabot iti 22 a pulgada ti kabengbeng ti snow.
Immuna iti daytoy, nangideklarar ti state of emergency ti sumagmamano nga estado ti Estados Unidos gapu iti pangta ti nakaro a panagtudo ti niebe.
Karaman ditoy da New Jersey Gov. Mikie Sherrill, New York, Gov. Kathy Hochul ken Philadelphia Mayor Cherelle Parker.
Mapatta-patta nga umabot iti 35 a milyon nga indibidual ti maapektaran ti nakaro nga snow storm manipud iti Philadelphia agingga iti Boston.
