LAOAG CITY – Umaboten iti 1.6 milyon a pasiente ti nabenepisiaran iti Zero Balance Billing program ti administrasion Marcos, basar iti Department of Health (DOH).
Iti kaudian a datos ti ahensia, umabot iti P95 bilyon a gatad ti hospital bills ti binaklay ti gobierno manipud idi Hulio 2025 agingga iti Enero 2026.
Basar iti Department of Health, agtultuloy ti panangitandudona ti pannakaipalawa pay iti programa pakairamanan ti shared pay ward para iti PhilHealth direct contributors kas ti middle-class employees.
Isagsaganan ti ahensia nga ipatungpal ti inisyatiba kadagiti napili a local government unit hospitals.
Iti babaen ti Zero Balance Billing, dagiti pasiente iti Department of Health hospitals ket saanen a kasapulan pay nga agbayad para iti medical services, agas ken professional fees dagiti doktor.
