LAOAG CITY – Nagtalinaed a nakaro ti congestion kadgiti pagbaludan iti pagilian, uray nalpasen ti naiget nga anti-drug campaign ti gobyerno.
Daytoy ket basar iti kaudian a datos ti Bureau of Jail Management and Penology (BJMP).
Iti panangtingiting ni Dr. Rogelio Alicor Panao, agus-usar ti datos ti Bureau of Jail Management and Penology idi Hulyo 2025, umabot iti average a 292% ti congestion rate iti 337 a pagbaludan, kayatna a sawen, ti maysa a pagbaludan a nadisenyo para iti 100 a balud ket addaan ti 300 a detainees.
Innayon ni Panao, a ti problema ket “layered crisis”, ti napagtipon a nangato nga arrest volume, naginad a case disposition, ken saan a patas a kapasidad ti rehiyon.
Kuna pay ni Panao a ti congestion ket “persistent institutional condition,” nga agkasapulan ti reporma iti pakabuklan ti justice system, saan laeng nga iti physical expansion ti pagbaludan.
