LAOAG CITY – Posible a mapasamak ti panagkapsot ti suplay ti kuriente iti panawen ti kalgaw.
Daytoy ket basar iti Independent Electricity Market Operator of the Philippines (IEMOP).
Inbatad ni Engr. Isidro Camacho, Vice President for Trading Operations ti Independent Electricity Market Operator of the Philippines, mabalin a maaddaan ti forced outages dagiti planta.
Inlawlawagna a limitado ti kuriente no sobra ti kinabara ti panawen no sadinno a dagiti sumagmamano a planta ti kuriente ti dumaldalan iti maintenance.
Nupay kasta, kuna ni Camacho nga adda dagiti naisagana a programa ti Department of Energy (DOE) tapno maaddaan ti umdas ti suplay ti kuriente inton kalgaw.
Kunana a ti nangato a temperatura ket masansan a mapaspasaran iti bulan ti Abril ken Mayo isut gapuna a kadagitoy a panawen ket napigsa nga agkasapulan dagiti umili ti kuriente.
