LAOAG CITY – Inpakaammo ni Mayor James Bryan Alcid a pormalen a nalukatan ti baro nga atraksyon iti Barangay Suyo ditoy ciudad ti Laoag.
Daytoy ket ti Sunflower ken Mulberry Farm kas paset ti Agro-Tourism Program ti siudad.
Kunana a daytoy ket napintas nga atraksyon, pangalaan ti ladawan wenno ag-selfie aglalo kadagiti nature lovers.
Inpanakkel ti mayor a Makita iti lugar dagiti agkakapintas a sunflower a nagtitinnulungan a pinatanur dagiti bumarangay, agriculture office ken nagduduma a grupo.
Inawis ti mayor dagiti umili a mapan bisitaen ti lugar gapu ta ti blooming stage ti sunflower ket dua laeng a lawas.
Malaksid iti sunflower farm, adda pay iti abayna dagiti mula a Mulberry (Amoras) a mabalin pay a ramanan ti bungana.
Segun ken ni Alcid, ti nasao a farm ket aglawa ti agarup 700 square meters.
Maragsakan ni Mayor Alcid gapu iti inisyatibo ken gagar ti tunggal maysa a mangkita dagiti wagas tapno maiyam-ammo ti siudad.
Inpasingked na ti agtultuloy a suporta ti administrasion na ken gobierno local ditoy siudad kadagiti programa ken inisyatibo para ti pagsayaatan ti tunggal maysa.
