LAOAG CITY – Inpakaammo ni Dr. Marsha Lou Wapan, mangidadaulo ti Laoag City General Hospital nga adda ti maisayangkat a programa kagiddan iti pannakaselebrar ti National Buntis Day 2026 inton Marso 10 iti LCGH Outpatient Department.
Segun kenkuana, magutgutigot dagiti masikog a residente ditoy siudad ti Laoag a makipaset para iti libre a prenatal check-up, leksion maipapan iti prenatal care, family planning counselling ken freebies.
Inbatadna a mabalin nga ag-pre-register dagiti agkalikagum nga agatendar babaen iti panag-scan ti QR Code wenno registration link daytoy nga aktibidad.
Inlawlawagna a napintas daytoy nga aktibidad para kadagiti masikog nga ina tapno maadalanda iti umiso a panangtagiben iti bagi dagitoy ken dagiti ipasngayda nga anak.
Innayonna a babaen iti daytoy nga aktibidad ket makatulong tapno saan a mairisgo iti bagida ken ti sikogda nga ubing.
