LAOAG CITY – Ikonkonsiderar ti gobierno nga ibaba dagiti bayadan kadagiti eropuerto iti intero a pagilian tapno makatulong a mapagtalinaed a natibker iti singir ti plete iti eroplano kagiddan iti manamnama a panagdudupudop dagiti biahero iti panawen ti Holy Week.
Basar iti Department of Transportation, paset daytoy kadagiti addang nga inbilin ni Presidente Ferdinand Marcos Jr. tapno makissayan ti nakaro nga epekto ti ngumatngato a presio ti gasolina.
Inbatad ni Department of Transportation Acting Secretary Giovanni Lopez nga ikonkonsiderarda ti panagkissay ti sumagmamano a bayadan iti eropuerto gapu iti manamnama a panagdudupudop dagiti pasahero iti Holy Week.
Karaman ditoy ti landing ken take off fee nga ipatpatungpal ti Civil Aviation Authority of the Philippines (CAAP).
Saan pay a masinunuo ti sekretario no mano ti mabalin nga ibaba kadagiti bayadan ngem daytoy ket ad-adalen pay laeng ti ahensia.
Kunana nga aniaman a mabukel a proposal ket iprisentar iti board tapno aprobaran ken posible a makaiparuk-atda ti desision para iti posible nga adjustment iti plete inton sumaruno a lawas.
Immunan nga inrakurak ni Presidente Marcos ti sumagmamano nga addang ti gobierno tapno maalay-ayan ti nadagsen nga epekto ti panagngato ti presio kadagiti produkto a petrolyo gubuay iti mapaspasamak a krisis idiay Middle East.
