LAOAG CITY – Naaprobaranen ti maysa a gakat a mangipaay ti insentibo kadagiti kolehio a residente ditoy siudad ti Laoag nga agturpos nga addaan ti latin honors.
Segun ken ni Vice Mayor Rey Carlos Fariñas, napintas daytoy a programa gapu ta maikkan ti gunguna dagiti estudiante a makagun-od ti nangato a grado.
Inbatadna a dagiti agturpos iti kolehio nga addaan ti latin honor kas ti summa cum laude ket makaawat ti 10 a ribu a pisos idinto a 5 a ribu a pisos ti magna cum laude.
Inlawlawagna a dakkel daytoy a tulong para kadakuada tapno adda ti nayon a pagpaaladanto wenno aniaman a kayatda a pangigastoan.
Innayonna a babaen iti daytoy nga addang ket ad-adu pay dagiti maipannakkel a professional nga agtutubo ditoy siudad ti Laoag.
