LAOAG CITY – Mangipaay ti City Government of Laoag ti fuel subsidy kadagiti nagduduma a sektor ditoy siudad ti Laoag tapno prebentaran ti panagngato ti plete.
Segun ken ni Mayor James Bryan Alcid, manamnama nga inton sumaruno a lawas ket maibunongen daytoy para iti fuel subsidy.
Inbatadna a dagiti mabenepisiaran iti daytoy ket saan laeng a para kadagiti tricycle drivers no diket pakairamanan dagiti agpaspasada ti jeep, mannalon ken mangngalap ditoy siudad ti Laoag.
Inlawlawagna a daytoy ti napanunotanda nga aramiden a wagas tapno saan a maipangato ti plete.
Kunana nga adda ti pannakisaritana ti Presidente iti Federation of Tricycle Association of Laoag wenno FETAL tapno makontrol ti panagngato ti plete.
Innayonna nga adda ti 16 a milyon a pisos ti iparuk-at a pundo ti lokal a gobierno ditoy siudad ti Laoag no sadinno nga adda ti pakabuklan a 5,310 ti maipaayan ti saan a bumaba iti tallo a ribu a pisos iti tunggal maysa.
