LAOAG CITY – Ad-adalen ni Sen. Sherwin Gatchalian ti pannakai-ban wenno panangipawil kadagiti menor de edad iti panagusar ti social media.
Daytoy ket kagiddan ti report ti pulisia mainaig iti nalappedan a plano a mass shooting iti pagadalan ti grupo dagiti agtutubo idiay Laguna.
Inbatad ni Gatchalian, ti plano a panangatake dagiti agtutubo ket nasken nga agserbi a wake-up call iti Philippine National Police (PNP) ken makaalarma ti maysa nga online gaming community ket posible a nakaimpluwensia kadagiti agtutubo tapno agaramid ti kinaranggas.
Inlawlawagna a makapadanag ti estado ti mental health dagiti estudiante isut gapuna nga inpetteng ti Senador a kasapulan ti naig-iget nga school-based support systems.
Malaksid iti daytoy, plano a mangipasa ni Gatchalian ti gakat no sadinno a dagiti menor de edad nga agtawen ti 16 agpababa ket mapawilan iti panagusar ti social media.
Daytoy nga addang ket immunan nga inpatungpal dagiti pagilian kas iti Australia, Denmark ken Norway.
