LAOAG CITY – Inbasura ti Sandiganbayan ti dua a nagsina a kaso ti gobierno a mangkamkamat iti maipagarup nga ill-gotten wealth ken coco levy funds ti pamilia Marcos ken Romualdez kalpasan nga inrason ti korte ti nalabes a pannakaitantan ti panangtingiting ken dagiti isyu teknikal.
Iti naiparuk-at a resolusion ti Second Division ti anti-graft court, immannugot daytoy kada dati a Presidente Ferdinand Marcos, dati a First Lady Imelda Marcos ken Juan Ponce Enrile iti 1987 civil case.
Naibasura daytoy gapu iti inordinate delay no sadinno nga inpetteng ti korte a ti agarup 40 a tawen a panagdengngeg ket direkta a naglabsing iti karebbengan dagiti akusado iti alisto a panangtingiting.
Inbasura pay ti apela ti Presidential Commission on Good Government (PCGG) a maminsan manen a lukatan ti kaso.
Sinuportaran dagiti mahistrado ti argumento ti depensa a nakompromiso ti kabaelanda a mangilaban gapu iti panagpukaw dagiti ebidensia ken pannakatay ti sumagmamano a saksi iti panaglabas ti panawen.
Nupay kasta, inlawlawag ti korte a tuloy ti panagdengngeg para kadagiti dadduma pay a nabatbati nga akusado.
Kabayatanna, iti maysa a nagsina a desision ti Sixth Division, inbasura met ti kaso a gagem a makumpiskar ti sumurok $5 milyon a maipagarup a saan a maipalawag a baknang ti pimmusay a ni dati a Leyte Governor Benjamin Kokoy Romualdez ken ti asawa daytoy.
Inbasar ti korte ti desision iti prinsipio ti judicial stability wenno non-interference no sadinno a saanen a mabalin a makibiang ti Sixth Division ti immuna a bilin ti Fourth Division a nangiparuk-at iti nasao a pundo idi 2025.
Inbilang ti korte ti nabayag a pannakaitantan ti kaso kas indikasion ti naan-anay a panangabandonar ti estado iti panangkamat iti daytoy.
Naammoan a ni Kokoy Romualdez ket kasinsin ni dati a First Lady Imelda Marcos.
Ti dua nga inbasura a kaso ket paset ti serye dagiti addang a legal ti gobierno tapno maala ti bilyon a pisos a pundo.
