LAOAG CITY – Nangisagana ti 40 a testigo ti kampo ni dati nga House Speaker Ferdinand Martin G. Romualdez ngem mabalin daytoy a makissayan depende iti ebidensia nga idasar ti prosekusion.
Segun ken ni Atty. Ade Fajardo, spokesperson ni Romualdez a tentative pay laeng ti listaan ken repasoen pay laeng ti depensa dagiti ebidensia ti prosekusion sakbay a maamoan no siasinno ti kasapulan nga agtestigo.
Posible nga saan nga awagan ti sumagmamano a testigo no mapagdesisionan ti depensa nga saan a kasapulan a sungbatan dagiti ebidensia ti prosekusion.
Manamnama a mairaman mismo ni Romualdez iti listaan dagiti testigo.
Kunana a “most likely” nga sumango ken mangipaay ti testimonia ni Romualdez no panawen ti depensa nga mangidatag ti ebidensia.
Maidasar ti listaan dagiti tesigo iti pre-trial brief ti depensa.
Nupay kasta, nakasagana payen ti petision para iti piansa ken manamnama nga mangipila daytoy kalpasan ti pormal a panagleppas ti pre-trial proceedings.
Manamnama nga mangrugi ti panagdengngeg iti piansa iti maikadua a lawas ti Oktubre, no sadinno umuna nga presentar ti prosekusion dagiti ebidensiada.
